Ons toer in SA (1)

Dit het alles begin met die dorpie wat my beste helfte op ‘n  kaart raakgelees het ….. Dorp-Op-die-berg!  Ons moes eenvoudig die plekkie besoek! En nou ja, as jy sopas, na drie jaar in die buiteland, voet-aan-wal sit in ons mooiste land Suid-Afrika, begin jy beplan. Ons was gelukkig dat ons ‘n maand of twee “vry” was om te doen wat ons wou, voordat my man weer by die volgende werk begin.

En so het die beplanning vir ons “road trip” begin….. (ek het nog nie ‘n lekker Afrikaanse woord vir “road trip” gekry nie….. ‘n padroete klink klakkelose vertaling ….. dalk ‘n omte-kuierroete (?), of vat-die-pad-en-kuierroete (?), of sommer net vat-die-pad-en-kuier!)  Het jy dalk ‘n lekker woord vir “road trip”?

Die beplanning het op die oudtydse manier begin – ‘n padkaart teen die muur vasgeplak: sodoende kon ons mooi die “prentjie” sien van waar ons gaan ry en waar ons gaan slaap.

Hoe dit ookal genoem word, ons roete het in Kaapstad begin, en ja, 28 dae later weer in Kaapstad geëindig. En wát ‘n oneindige voorreg was dit nie! (En dit alles net om te sien hoe lyk Dorp-op-die-berg…..!)

Op 5 Mei 2016 begin ons die roadtrippie met ‘n hoogtepunt (die eerste van 28 hoogtepunte!). Ons besluit dat ons darem nie onsself kan uitput met die eerste dag se ryery nie, en slaap die eerste aand by Schooneoord Country Lodge in Swellendam. Ons is soos opgewonde kinders in ‘n “sweetie winkel” – alles is vir ons mooi! Die berge, die mense, die blou lug, die watervalletjies uit die berge, …!  Tot die pad na Swellendam is vir ons mooi. Sekerlik omdat die pad eerstens verby Die Pampoenstalletjie ry. En tweedens, omdat die pad verby Nuy se splinternuwe restaurant Nuy On The Hill ry. Is dit nodig om enigsins meer hieroor te sê…?

  

Na ‘n heerlike kuier op die pad, het ‘n heerlike bederf by Schooneoord gewag! Hierdie is voorwaar ‘n juweel vir enige man wat sy vrou wil bederf!

En so kom ons aan die einde van dag nommer 1! Hou hierdie spasie dop vir ‘n opvolg na die res….!

Tot ons weer saamkuier!