Lagos City Marathon is oppad…

Dit gons behoorlik hier in Lagos oor die Lagos City Marathon wat môre hier in die stad aangebied word. Elke liewe FaceBookgroep wat iets met Lagos te doen het, berig daaroor. En hier gaan dit verseker nie oor die gewildheid daarvan nie (ja, dalk so effentjies), maar grotendeels oor die impak wat dit op Lagos se verkeer gaan hê.

Ek het al meermale geskryf oor die erge verkeer wat in Lagos is. Op ‘n mooi rustige dag, kan die verkeer maklik soos spitstyd op die N1 in Kaapstad lyk…..chaos! Met ‘chaos’ bedoel ek nie georganiseerde chaos nie, ek bedoel CHAOS in hoofletters. Daar word getoet as jy wil bane verwissel, of as jy iemand wil verbysteek, of as die motor langs jou te naby aan jou ry, of ja, sommer net, omdat jy KAN! (en dit is hoekom ek sit en lees as ons ry, want dan sien ek nie al die … chaos raak nie…!)

Die hoofroete wat Lagos Island en die Mainland verbind, is die Third Mainland Bridge. Dit is ook die hoofroete na die lughawe…. En die brug gaan môre vir die duur van die maraton … aan beide kante gesluit wees! So, hier kom ‘n ding…! Verder word strate rondom ons woonstel ook toegemaak.

Daar word verwag dat nagenoeg 50 000 atlete aan die maraton gaan deelneem. Hierdie maraton word gereken as een van die bestes wêreldwyd, en dit word in dieselfde asem as die Comrades maraton genoem. Wel, as ek voor die tyd geweet het wat is die prysgelde, sou ek dalk ‘n plan gemaak het om …. Nee wat, ek sal maar by die huis bly…! Daai tipe kilometers doen ek net met my kar!

ACCESS BANK LAGOS CITY MARATHON 2016 OVERALL PRIZE MONEY FOR MEN AND WOMEN
1st Position	$50,000
2nd Position	$40,000
3rd Position	$30,000
4th Position	$20,000
5th Position	$15,000
6th Position	$10,000
7th Position	$8,000
8th Position	$6,000
9th Position	$4,000
10th Position	$2,000

Wat wél meer in my afstand-lyn is, is die Run for a Cure run / walk wat elke jaar in Lagos plaasvind. ‘n Wonderlike geleentheid om oefening te kry terwyl dit vir ‘n goeie doel gaan. ‘n Dag waarop Lagos PIENK word vir al ons liewe vriende wat swaarkry as gevolg van kanker. Die 6,6 km kan gedraf of gestap word, en dit is baie gewild onder die expat-gemeenskap. Jy doen hierdie verseker nie vir ‘n prysgeld van $50 000 nie, maar jy dra dit op aan iemand spesiaals wat jy ken wat deur kanker geraak is. Daardie beloning is groot genoeg!