Small World 2016

En toe is dit alweer tyd vir die groot bymekaarkoms in Lagos: Small World 2016. Gróót was hierdie bymekaarkoms – ‘n hele 4 000 siele almal saam. ‘n Wonderlike geleentheid waaroor ek voorheen al geblog het. ‘n Wonderlike geleentheid waar expatlande teruggee aan ons gasheerland – Nigerië!

Hierdie jaar se tema was “World of Colours” – synde dat ons letterlik van oor die hele wêreld hier bymekaar is. Verskillende kleure, ras, geloof, kultuur, en noem maar op. (Nogal ironies omdat ons nogal met dieselfde #colour-storie in SA sit…)

Mense het laatmiddag na die hekke gestroom (en natúúrlik verkeersknope veroorsaak…). Almal vrolik en opgewonde om te deel aan die pret van eet, drink en gesels.

Ons kon natuurlik nie vinnig genoeg by die Suid Afrikaanse stalletjie uitkom nie…….Dié was gelaai met biltong, boerewors, Mrs Ball’s blatjang, en …. koeksisters!! Man, toe verlang ons darem lekker terug huis toe! Die volgende pitstop was België. Nie net oor die heerlike wafels en pannekoeke nie, maar ook oor hul alombekende … Belgiese bier!

(jammer vir sensitiewe lesers, maar die Mannekin Pis staan uit eie reg in Brussels. Hierdie is wel net ‘n replika…)

So het ons die aand deurgekuier: Kebabs by Griekeland, kaas by Nederland, en met ongeveer 25 stalletjies om te besoek, was dit onmoontlik om oral uit te kom.

Stiptelik 8 uur het die vertoning van dans en uitbeelding begin (ja, stiptelik – vreemd vir ‘n Afrikaland, maar onthou….expats reël dit!). Die voorstellings van die lande was pret om na te kyk. Al die dansers is amateurs, wat dit net nog meer besonders maak. Suid Afrika het ‘n oulike uitbeelding van wit-en-swartkaartmannetjies voorgestel. Met een haal van ‘n massiewe verfkwas van reënboogkleure uitgevoer deur “mnr Nelson Mandela”, het die kaartmannetjies verander in veelkleurige dansers! Welgedaan!